الشاعر الدكتور جميل الدويهي
يا شاغلين البال طُلّو قبالنا
مرجوحتين من العتب مرسالنا
لو كان صِرتو بْغير شارع ساكنين
معليش لولا بتسألو عن حالنا.
جايي الشتي وفزعتْ من صَوت الهدير
جْناحين سود كبار عالسهل الكبير
فات الهوا… طارو القصايد بالهوا
ولما رحت تا نام… ما لْقيت السرير.
يا تاركين الحيّ، مش عم تِطْلعو
من خاطري… ويا ريت صوتي بتسْمعو!
لا تجَعْلكو المكتوب لو مرّ البريد
مِنخاف إنّو حْروفنا يِتْوجّعو.
قنديل مِطْفي… والبيوت مسَكّرين
ومطرح ما كنّا نلتقي مَقعد حزين
وطاف النهر تا صار أعلى من الشجَر
من وقت ما قلْتو عا طُول مسافرين.
معقول رح تتغيّر علينا الدني
ونعود نلبس من حرير، ونغتِني؟
منشان هَون ولادنا ما يكْبرو
عم نرْبط بخيطان إيّام السنه.
